Nangabongkag ug nanga pilo ang motorsiklo samtang patay usab ang driver niini nga giilang si alyas “Kimkim” 19-anyos residente sa Brgy. Bayog Ormoc City lakip usab ang backride niini nga si alyas “Stev” 21-anyos ug residente sa Sitio Tipik 2, Brgy. San Jose sakop sa Ormoc City, human misungag ang ilang gimaneho nga motor ngadto sa usa ka wingvan nga gimaneho ni alyas “Lio” 50-anyos ug residente sa Brgy. Dayhagan sakop gihapon sa syudad sa human sila mag abot sa kadalanan Brgy. Cabulihan sakop sa dakbayan pasado ala 1 ang takna sayo sa kaadlawon karong adlawa, Hulyo 11, 2026.
Sumala pa sa inisyal nga imbistigasyon sa Traffic Enforcement Unit, nagbyahe ang wingvan gikan sa Brgy. Concepcion padulong sa Brgy Cagbuhangin samtang ang motorsiklo naggikan usab sa Brgy. San Jose ug nagbyahe padulong sa sentro sa syudad. Sa pag-abot sa kurbada nga bahin sa lugar sa panghitabo, mitipas sa pikas linya ang motorsiklo hinungdan nga misungag kini sa nagpadong nga wingvan. Tungod sa kakusog sa bangga, napasok ngadto sa ilawom sa wingvan ang motorsiklo uban ang driver niini samtang nalagpot usab ang backride nga maoy hinungdan sa ilang hinanaling kamatayon. Naguba usab ang atubangan sa wingvan apan luwas raman hinuon ang driver niini.
Gisulayan pa pagdala sa Ormoc Rescue ang mga biktima ngadto sa balay tambalanan apan gideklara kini nga dead on arrival sa attending physician.
Nagpabilin sa lugar sa nahitaboan ang wingvan, samtang ang driver niini og ang motorsiklo nga naguba gidala ngadto sa opisina sa Traffic Enforcement Unit alang sa tukmang dokumentasyon og disposasyon.
