Nakadawat og suporta nga organic fertilizer ang duha ka Indigenous Peoples Organizations (IPOs) sa Surigao del Sur gikan sa Department of Agriculture Caraga ubos sa Kabuhayan at Kaunlaran ng Kababayang Katutubo (DA-4K) Program alang sa CY 2026.
Ang mga benepisyaryo mao ang mga miyembro sa Pakwan Manobo Indigenous Cultural Communities (PAMICC) sa Lanuza ug ang Manobo of Rajah Cabungso-an Ancestral Domain Management Organization (MARCADMO) sa Lingig.
Gilauman nga dako ang ikatabang sa maong ayuda aron mapataas ang produksiyon sa mga tanom sama sa mga utanon, mais, upland rice, calamansi, ug uban pang mga abot. Gilauman usab nga mapaayo niini ang kahimtang sa yuta, mapalambo ang produksyon sa uma, ug madugangan ang panginabuhi sa mga mag-uuma nga lumad.
Kabahin kini sa padayon nga programa sa nasudnong gobyerno sa pagpalig-on sa malungtarong agrikultura, pagpausbaw sa food security, ug paghatag og mas maayong oportunidad sa panginabuhi alang sa mga komunidad sa mga lumad ubos sa Bagong Pilipinas nga programa.
Ang maong distribusyon kabahin sa mas dako nga inisyatibo sa DA Caraga diin 1,962 ka sako sa organic fertilizer nga nagkantidad og ₱2.35 milyon ang gipanghatag sa lima ka Indigenous Peoples Organizations sa tibuok Caraga niining buwana.
Photo courtesy: DA Caraga
