Sikop ang usa ka giilang High-Value Individual (HVI) human makuhaan og gibanabanang PHP 850,000.00 nga kantidad sa gituohang shabu ug usa ka ilegal nga armas sa malampusong buy-bust operation kaganihang kadlawon, Hulyo 10, sa lungsod sa Cantilan.
Ang operasyon gipahigayon ubos sa pagpanguna sa Surigao del Sur Police Provincial Office (SDSPPO) pinaagi sa direktiba ni Provincial Director PCOL Jeffrey Lawrence D. Mauricio.
Giila ang suspek nga si alyas “Lolong”, 39-anyos, minyo, ug residente sa Purok 2, Barangay Calagdaan sa maong lungsod. Sumala sa kapulisan, bag-ong nailhan nga pusher si Lolong ug nalista kini isip HVI sa tibuok probinsya.
Nakuha gikan sa posisyon sa suspek ang 23 ka heat-sealed transparent plastic sachets nga adunay sulod nga gituohang shabu, nga mutimbang og 125 gramos ug nagkantidad og PHP 850,000.00. Apil usab ang 4 ka sachet nga duna pay mabiling timailhan sa maong droga, usa ka yunit sa 9mm Armscor pistol, usa ka magazine, ug 20 ka buhing bala, mga drug paraphernalia, usa ka sling bag, upat ka Android phones, duha ka ID (Voter’s ug National ID), usa ka Yamaha Aerox nga motorsiklo, ug kwarta nga mobalor og PHP 6,000 lakip ang PHP 500 nga buy-bust money.
Ang suspek ug ang mga nakumpiskang ebidensya anaa na karon sa kustodiya sa Cantilan Municipal Police Station alang sa saktong disposisyon. Giandam na usab sa kapulisan ang pagpasaka og mga kasong paglapas sa Republic Act 9165 (Comprehensive Dangerous Drugs Act of 2002) ug Republic Act 10591 (Comprehensive Firearms and Ammunition Regulation Act) batok sa suspetsado.
Photo courtesy: SDSPPO
