Gitugyan sa Consulate General of Japan sa Davao ang proyekto nga Bamboo Processing Equipment ngadto sa Bobongon Tree Planters Association, Inc. (BTPAI) sa Purok 3, Barangay Bobongon, Santo Tomas, Davao del Norte niadtong Hulyo 9, 2026.
Nagkantidad kini og USD 56,976 o gibana-banang ₱3.23 milyon. Gipondohan ubos sa Japan’s Official Development Assistance pinaagi sa Grant Assistance for Grassroots Human Security Projects.
Tumong niini ang pagpalambo sa produksyon sa asosasyon, paghimo og dugang bili nga mga produktong kawayan, ug pagsuporta sa malungtarong panginabuhian ug pagpanalipod sa kinaiyahan.
Gipasalamatan ni Santo Tomas mayor Roland S. Dejesica si Consul General Ono Hirotaka ug ang gobyerno sa Japan alang sa maong proyekto, nga matud pa makatabang sa pagpalig-on sa panginabuhian sa komunidad ug sa mga programa sa reforestation sa yutang kabilin sa mga lumad.
Mitambong usab sa turnover ceremony sila DENR XI Regional Director Atty. Ma. Mercedes V. Dumagan, DTI XI Regional Director Romeo L. Castañaga, Davao Norte Gov. Edwin Jubahib, Vice Governor Clarice Jubahib, ug uban pang mga opisyal ug mga miyembro sa Bobongon Tree Planters Association sa Sto. Tomas.
Photo Courtesy: Santo Tomas Information Office
