Gitunol sa Lokal nga Panggamhanan sa Kapalong ang Emergency Shelter Assistance ngadto sa mga pamilyang naapektuhan sa kusog nga linog nga miigo sa lungsod niadtong Hunyo 8, 2026, isip tabang sa ilang pagbangon ug pag-ayo sa mga naguba nilang panimalay.
Sumala sa LGU Kapalong, pinaagi sa Rapid Damage Assessment and Needs Analysis (RDANA) Team, nasuta nga unom ka balay ang totally damaged ug 13 ang partially damaged.
Pinaagi sa mando ni Kapalong mayor Edgardo L. Timbol ug pag-aprubar sa municipal government, ang matag pamilya nga adunay totally damaged nga balay nakadawat og ₱10,000, samtang ₱5,000 ang gihatag sa matag pamilya nga adunay partially damaged nga panimalay.
Pormal nga gipanghatag ang maong pinansyal nga tabang niadtong Hulyo 8, diin mapasalamaton ang mga benepisyaryo sa suporta nga ilang nadawat gikan sa lokal nga panggamhanan atol sa panahon sa kalisdanan.
Gipasiugda sa LGU Kapalong nga magpadayon kini sa pagpalig-on sa mga programa sa disaster response ug recovery aron masiguro nga ang tanang pamilyang naapektuhan sa kalamidad makadawat sa hustong tabang ug serbisyo.
Photo Courtesy: Kapalong InfoCenter
