Gidakop sa kapulisan ang 30-anyos nga lalaki nga namaligya og illegal nga sigarilyo atol sa gikasang entrapment operation sa 2nd Surigao del Norte Provincial Mobile Force Company ug Socorro Municipal Police Station, alas 10:45 sa gabii, sa Purok 02, Barangay Taruc, lungsod sa Socorro, Surigao del Norte.
Sa gipadangat nga impormasyon ni Provincial Director PCOL Warren E. Dablo, ang operasyon kabahin sa kampanya sa Surigao del Norte Police Provincial Office o SDNPPO batok sa iligal nga patigayon ug pagpamaligya sa mga smuggled nga sigarilyo.
Narekober gikan sa suspek ang 47 ka ream sa Cannon Menthol 100’s nga nagkantidad og 23,500 pesos ug 98 ka ream sa Modern Cigarettes nga nagkantidad og 49,000 pesos, nga mokabat sa P72,500 pesos ang kinatibuk-ang gibana-banang kantidad sa mga nakumpiskang sigarilyo.
Kasong paglapas sa Republic Act No. 10643 o Graphic Health Warnings Act of 2014 atubangon sa suspek.
Gipadayag ni PCOL Dablo nga magpadayon ang kapulisan sa hugot nga kampanya batok sa smuggling ug iligal nga patigayon aron mapanalipdan ang kita sa probinsya, mapadayon ang kahusay sa komunidad ug masiguro ang kaayohan sa katawhan.
