Mokabat sa 28 ka tawo ang nakalas human sa usa ka dako ug kalit nga sunog nga miulbo sa pabrika sa Huiteng Shoe Company sa dakbayan sa Jinjiang, lalawigan sa Fujian, niadtong Hulyo 9, 2026. Gumikan sa kabug-at sa trahedya, dinalian nga nimando si Chinese President Xi Jinping og subsob nga operasyon sa search and rescue ug mibahad nga silotan ang mga sad-an.
Dali usab nga gidakop sa kapulisan ang tag-iya sa maong kompanya ug gi-freeze ang tanang accounts sa establishamento alang sa gihimong imbestigasyon. Atol sa pag-ulbo sa kalayo sa udto, nasayran nga anaa sa sulod sa building ang kinatibuk-ang 237 ka mga trabahante ug duha ka mga bisita.
Sa gihimong pagluwas sa mga bombero, hingpit nilang nakuha ang 213 ka indibidwal gikan sa nagdilaab nga estruktura, apan ang duha kanila gideklara nga patay na pag-abot sa ospital. Sa pagpadayon sa pagpangita sa mga rescue teams, nakompirmar sa state broadcaster nga CCTV nga ang laing 26 ka tawo nga missing ang hingpit na usab nga nakalas sa sulod.
Sa kasamtangan, wala pa matino ang tinuod nga hinungdan sa kalayo, apan dako ang pagtuo sa mga otoridad nga ang mga materyales sa sapatos ang hinungdan sa paspas nga pagkaylap niini. Ang dakbayan sa Jinjiang nailhan isip sentro sa paghimo og sapatos nga pang-sports, hinungdan nga nanawagan ang gobyerno sa China sa mas estrikto nga safety standards sa tanang rehiyon
Photo Courtesy: Xinhua News Agency
