Gilusad sa Department of Social Welfare and Development Field Office 10 (DSWD-10) ug sa Lokal nga Kagamhanan (LGU) sa Bukidnon ang usa ka dako nga programa sa hinabang-pinansyal alang sa mga kabus nga pasyente pinaagi sa pagpirma ning bag-ohay lang sa usa ka Memorandum of Agreement (MOA).
Ubos niini nga kasabutan, magtinabangay ang duha ka buhatan aron mapadali ang paghatag og dinalian ug libreng medikal nga tabang ngadto sa mga indigent nga pasyente nga nagpatambal sa walo ka mga provincial hospitals sa tibuok probinsya.
Pinaagi sa Assistance to Individuals in Crisis Situation (AICS) nga programa sa DSWD-10, makadawat ang mga kwalipikadong benepisyaryo og Guarantee Letter (GL). Kini magsilbing opisyal nga garantiya nga ang maong ahensya maoy mobayad sa gastuhon sa hospital, hinungdan nga dili na kinahanglan magpagawas pa og dakong kwarta gikan sa kaugalingong bulsa ang pamilya sa pasyente panahon sa medikal nga emerhensya.
Gipangulohan ni DSWD-10 Regional Director Glofelia Uayan ug Bukidnon Governor Rogelio Niel Roque ang maong signing ceremony uban ang mga administrador sa walo ka mga hospital nga nahimutang sa Malaybalay City, Maramag, San Fernando, Manolo Fortich, Kalilangan, Kibawe, Talakag, ug Malitbog.
Ubos sa kasabutan, ang DSWD-10 maoy mosiguro sa pag-validate sa mga dokumento sa pasyente, samtang ang mga hospital magbutang og mga dedikadong kawani nga maoy mopaspas sa pag-proseso sa billing. Kini nga pamaagi gihimo aron diretso nga ma-offset o makuha gikan sa kinatibuk-ang bayranan ang maong hinabang.
Photo Courtesy: LGU Bukidnon
