Gipadayon sa Senado ang pagpangita og paagi aron mapaspasan ang impeachment trial ni Vice President Sara Duterte human usa pa lamang ka testigo ang nahuman sa unang semana sa pagdungog.
Matod ni Senate President Sherwin Gatchalian, nakigkonsulta na sila sa prosecution ug defense aron mapamubo ang proseso sa trial, apan gisiguro niyang dili isakripisyo ang due process ug ang pagka-matinud-anon sa pagdumala sa kaso.
Gipasabot ni Gatchalian nga orihinal nilang giplano nga mahuman ang testimonya sa unang testigo, si NBI Agent John Mark Calilung, ug makapadayon dayon sa sunod nga testigo, apan nalangan ang pagdungog tungod sa daghang mga objections, debate, ug pagpangutana gikan sa duha ka kampo.
Bisan sa kahinay sa dagan sa hearing, iyang giingong malinawon ug organisado ang unang semana sa impeachment trial ug naglaom siyang mokunhod ang mga objections samtang nagapadayon ang proseso.
Giklaro usab ni Gatchalian nga ang 92 ka trial days gitakda aron hisgutan ang upat ka Articles of Impeachment batok sa bise presidente, lakip ang giingong sayop nga paggamit sa confidential funds, unexplained wealth, alegasyon sa assassination plot ug grave threats, ingon man bribery ug corruption sa Department of Education.
Matod pa niya, sayo pa aron hisgutan kon kinahanglan bang motestigo mismo si Vice President Duterte, tungod kay daghan pa ang ebidensiya ug mga testigo nga ipresentar.
Gilauman nga sa mga hearing sa Hulyo 13 hangtod 15, motambong isip mga testigo sila NBI Regional Director Jeremy Lotoc, NBI Director Melvin Matibag, ug Office of the Vice President Chief of Staff Zuleika Lopez.
Dugang pa ni Gatchalian, magpadayon ang impeachment trial tungod kay wala nagpagawas ang Korte Suprema og temporary restraining order o status quo ante order nga makapahunong sa proseso. Samtang ang isyu sa partisipasyon nila Senador Jinggoy Estrada ug Senador Rodante Marcoleta isip senator-judges padayon pang gihisgutan sa impeachment court.
Photo Courtesy: Philippine News Agency
