Nakahatag og dakong garbo sa Island Garden City of Samal probinsya sa Davao del Norte, ang usa ka Samalenyo nga atleta human makadaog og bulawang medalya sa 2026 Kyungmin University President’s Cup International Taekwondo Championships nga gipahigayon sa South Korea.
Giila ang mananaog nga mao si Prince Kenshin Maximo, usa ka high school student sa Holy Cross of Babak, Incorporated, nga mipakita og talagsaong kahanas, disiplina, ug determinasyon atol sa internasyonal nga kompetisyon aron masungkit ang kampeonato.
Sumala sa mga otoridad, ang maong kalampusan dili lamang nagpasidungog sa iyang eskwelahan kondili usab sa tibuok Island Garden City of Samal, nga nagpadayag sa nagkadako nga kahanas sa mga Samalenyo sa natad sa lokal ug internasyonal nga isports.
Gilauman usab nga ang nahimong kadaugan ni Maximo, mahimong inspirasyon sa mga batan-ong Samalenyo nga nagdamgo nga makaduwa sa internasyonal nga kompetisyon ug makahatag og dungog sa ilang komunidad ug sa nasud.
Photo Courtesy: Samal Island Information
