Gikumpirma sa Islamic Revolutionary Guard Corps (IRGC) sa Iran nga naglunsad kini og hiniusang drone ug missile attack batok sa mga base militar sa Estados Unidos sa Kuwait ug Bahrain.
Sumala sa IRGC, ang maong pag-atake maoy tubag sa bag-ong serye sa mga opensiba sa Estados Unidos batok sa mga southern coastal provinces sa Iran ug sa duha ka tulay sa silangang bahin sa nasud.
Gipahibalo sa Navy ug Air Force sa IRGC nga ilang gitarget ang daghang imprastraktura ug pasilidad sa militar sa Estados Unidos, lakip ang Camp Arifjan ug Ali Al Salem Air Base sa Kuwait, ingon man ang Shaikh Isa Air Base ug Juffair sa Bahrain.
Ang Juffair mao ang pinuy-anan sa Naval Support Activity, ang nag-unang base sa U.S. Navy sa Persian Gulf nga nagsilbi usab nga headquarters sa U.S. Fifth Fleet.
Sa pagkakaron, wala pa’y opisyal nga report kung adunay mga nasamdan o namatay tungod sa maong pag-atake sa mga base militar sa Estados Unidos.
Photo courtesy: foxnews
