Nasikop kagahapong adlawa, Hulyo 9 ang giila nga number one most wanted person sa rehiyon, nga suspek sa pagpamusil o pag-ambush kang Barobo Mayor Ronito L. Martizano ug sa iyang mga security escort niadtong Pebrero 3, 2026 sa Barobo, Surigao del Sur.
Giila ni PRO-13 Director PBGEN Marcial Mariano P. Magistrado IV ang nadakpan nga si alias “Commander Puma,” 39 anyos, residente sa Purok 4, Maapod, Barangay Cabacungan, Barobo, Surigao del Sur.
Sumala sa report sa Regional Intelligence Division (RID)-13, ang suspetsado kanhi Deputy Secretary sa nabungkag nga Guerrilla Front 30, Sub-Regional Sentro De Grabidad Westland sa Northeastern Mindanao Regional Committee (NEMRC), base sa working Periodic Status Report (PSR) alang sa ika-upat nga quarter sa 2016.
Human sa insidente sa pagpamusil sa Purok 2, Barangay Dughan nga nakaangol kang Mayor Martizano, 60 anyos, ug sa iyang security escort nga si PFC Kheven Mark Claridad, 29 anyos, sakop sa 67th Infantry Battalion sa Philippine Army, gimando dayon ni PBGEN Magistrado IV ang pagporma sa Special Investigation Task Group MARTIZANO ug ang paglunsad sa usa ka region-wide manhunt operation batok sa suspetsado.
Tungod sa pipila ka semana nga surveillance, imbestigasyon, ug koordinasyon sa nagkalain-laing ahensya, natultolan sa mga operatiba sa RID-13 ug Barobo Municipal Police Station ang gitagoan sa suspetsado ug malampusong naserbisyuhan kini og daghang warrant of arrest.
Nadakpan si “Commander Puma” pinaagi sa upat ka warrant of arrest nga gipagawas niadtong Abril 27, 2026 sa Regional Trial Court, 11th Judicial Region, Branch 28 sa Lianga, Surigao del Sur.
Nag-atubang siya og usa ka kaso sa Frustrated Murder ubos sa Criminal Case No. 26-5120 nga adunay girekomendang piyansa nga ₱200,000, ug tulo ka kaso sa Attempted Murder ubos sa Criminal Case Nos. 26-5126, 26-5123, ug 26-5125, nga matag usa adunay girekomendang piyansa nga ₱120,000.
Gidayeg usab ni PBGEN Magistrado IV ang dedikasyon sa mga operatiba nga nagpatuman sa operasyon. Matod niya, ang pagkadakop sa suspetsado usa ka lig-on nga mensahe nga dili makalikay sa balaod ang bisan kinsa nga mosulay sa paghulga sa kalinaw ug demokrasya.
Photo courtesy: PRO13
