Nasikop sa Bislig Component City Police Station ang mga suspetsadong gituohang responsable sa sunod-sunod nga panghitabo sa pagpangawat sa lain-laing bahin sa Bislig City, human sa malampusong hot pursuit operations nga gipahigayon sa kapulisan niadtong Hulyo 8, 2026.
Sumala kang PLTCOL Jassen N. Tuario, Acting Chief of Police sa Bislig Component City Police Station, usa sa mga nag-unang suspetsado ang usa ka 23-anyos nga lalaki nga residente sa Purok 1, Dampingan, Barangay Tabon, Bislig City. Gituohang siya ug ang iyang mga kauban maoy nagluyo sa sunod-sunod nga mga kaso sa pagpangawat sa dakbayan.
Base sa report ni PSSg Rolando U. Montilla Jr., ang labing bag-ong insidente nahitabo sa gawas sa Explorers Mini Mart nga nahimutang sa National Highway, Andres Soriano Avenue, Barangay Mangagoy. Nadiskubre sa tag-iya nga nahanaw ang unom ka mga kagamitan lakip ang mga lamesa, lingkuranan, ug usa ka industrial drum.
Pinaagi sa paspas nga responde sa kapulisan ug sa gilusad nga hot pursuit operation, natultolan ug nadakpan ang mga suspetsado sa maong adlaw. Bisan pa sa pagsulay sa pipila kanila nga mokalagiw, wala sila makalingkawas sa mga operatiba. Narekober usab sa mga pulis ang tanang gikatahong kinawat nga mga butang.
Gipahinumdoman usab sa Bislig Component City Police Station ang publiko nga maglikay sa pagpalit og mga barato apan kadudahang gigikanan nga mga butang. Matod sa kapulisan, ang pagpalit, pagdawat, o pagtago sa mga kinawat nga butang mahimong ikapasaka og kaso ubos sa Anti-Fencing Law o Presidential Decree No. 1612.
Sa pagkakaron, giandam na sa kapulisan ang kasong Theft (Pagpangawat) batok sa mga nadakpan nga suspetsado, samtang nagpadayon sila sa kustodiya sa Bislig Component City Police Station alang sa hustong disposisyon sa korte.
Photo courtesy: Bislig CPS
