Nasakpan sa akto sa kapulisan ang usa ka 32-anyos nga laborer atol sa gidudang pot session nga nahitabo sa Purok 2, Manggawong District, Barangay Mangagoy, Bislig City, mga alas-10:00 sa gabii niadtong Hulyo 8, 2026.
Gilunsad ang operasyon human makadawat og report gikan sa usa ka retiradong pulis nga nakasakop sa iyang laborer nga gituohang naggamit og ilegal nga droga. Dihang miresponde ang mga operatiba, ilang naabtan ang suspek nga giila lamang sa alyas “Edu,” residente sa Purok 8, Piape, Poblacion, Bislig City.
Sa operasyon, narekober gikan sa suspek ang tulo ka sachet nga adunay gidudang shabu nga adunay gibanabanang gibug-aton nga usa ka gramo ug Standard Drug Price nga ₱6,800, lakip ang lain-laing drug paraphernalia nga gituohang gigamit sa ilegal nga paggamit sa droga.
Sa pagkakaron, anaa na sa kustodiya sa Philippine National Police (PNP) ang suspetsado samtang giandam ang kasong paglapas sa Republic Act No. 9165 o ang Comprehensive Dangerous Drugs Act of 2002 batok kaniya.
Photo courtesy: RBB
