Gipasalig sa Malacañang nga madawat na karong tuiga sa mga kwalipikadong kawani sa gobyerno ang ilang 2024 Performance-Based Bonus (PBB) human nga gi-aprubahan ni President Ferdinand R. Marcos Jr. ang pagpagawas niini.
Sumala kang Palace Press Officer Undersecretary Claire Castro, sugdan na ang proseso sa pagpagawas sa bonus ug posible nga mas sayo kini madawat sa pipila ka mga ahensya depende sa kapaspason sa ilang pagproseso sa mga dokumento.
Gibutyag usab ni Castro nga nakalaan na ang pondo alang sa maong bonus ubos sa 2026 General Appropriations Act (GAA), nga maoy magtugot sa pagpagawas sa benepisyo ngadto sa mga kwalipikadong empleyado sa gobyerno.
Aron mahimong kwalipikado sa pagdawat sa Performance-Based Bonus, kinahanglan nga makab-ot sa usa ka ahensya ang labing menos 70 puntos sa performance assessment nga gitakda sa gobyerno.
Samtang, gilauman nga magpagawas ang mga may kalabutan nga ahensya og gilain nga mga giya ug pamaagi alang sa implementasyon ug aktuwal nga pagpagawas sa bonus ngadto sa mga kwalipikadong kawani sa gobyerno.
Photo courtesy: hrmasia.com
