Gidili sa Ireland ang pag-import og mga produkto gikan sa Israeli settlements sa gisakop nga Palestinian territories human maaprubahan sa parliament ang maong balaod.
Naglangkob ang balaod sa pagdili sa pagpasulod sa mga produkto gikan sa mga residential, agricultural ug negosyo nga nahimutang gawas sa internasyonal nga giilang utlanan sa Israel.
Sumala sa gobyerno sa Ireland, gibase ang balaod sa advisory opinion sa International Court of Justice (ICJ) niadtong 2024 nga nag-ingon nga ilegal ubos sa internasyonal nga balaod ang okupasyon sa Israel sa West Bank, East Jerusalem, ug Gaza Strip.
Ang Ireland usa sa mga nasod sa Europa nga kusog nga nagbatikos sa opensiba sa Israel sa Gaza ug miila sa Estado sa Palestine niadtong 2024.
Bisan pa niini, giingon nga limitado lamang ang epekto sa maong balaod sa ekonomiya sa Ireland tungod kay gamay ra ang kantidad sa mga produktong gi-import niini gikan sa maong mga teritoryo.
Photo Courtesy:Middle East Eye
