Balik na sa regular nga excise tax ang liquefied petroleum gas (LPG) ug kerosene human mikunhod ubos sa 80 dolyar kada baril ang average nga presyo sa Dubai crude oil niadtong Hunyo.
Subay sa giila sa Department of Energy (DOE), ang excise tax sa LPG mibalik sa ₱3.36 kada kilo, samtang ₱5.60 kada litro ang sa kerosene, subay sa gitakda sa Tax Code.
Nahinumdoman nga gisuspinde ni President Ferdinand Marcos Jr. ang pagpataw sa excise tax sa LPG ug kerosene niadtong Abril aron maminusan ang epekto sa pagsaka sa presyo sa lana tungod sa tensiyon sa Middle East.
Sumala sa Bureau of Internal Revenue (BIR), ang average nga presyo sa Dubai crude oil niadtong Hunyo miabot sa 79.45 dolyar kada baril, hinungdan sa pagbalik sa regular nga excise tax.
Bisan pa niini, giingon sa mga analista nga mahimo pang molabay og pipila ka bulan una mobalik sa lebel sa wala pa ang tensiyon sa Middle East ang presyo sa mga produktong petrolyo.
Photo Courtesy: Philippine News Agency
