Nagpadayon ang Department of Justice (DOJ X)sa pagpahimangno sa publiko bahin sa hugot nga pagbatok ug pagpugong sa human trafficking in persons isip kabahin sa National Anti-Trafficking in Persons Awareness Month sa Pilipinas.
Atol sa Talakayan sa PIA, gibutyag ni Senior Assistant City Prosecutor Louie Borja nga hapit mokabat sa 100 ang mga kaso sa human trafficking nga ilang nasulbad pinaagi sa conviction, samtang hapit usab 100 ka mga kaso ang ilang gipasaka sa korte.
Lakip sa mga dagkong kaso nga ilang natagad ang kaso ni Peter Scully, usa ka Australian national nga nakombikto tungod sa pagpang-abuso sa mga menor de edad nga biktima. Matud ni Prosecutor Borja, aduna gihapon mga pending cases nga naglambigit sa ubang mga langyaw nga gigamit ang internet ug online games aron makadani ug makapang-abuso og mga bata.
Apan gipasiugda sa DOJ nga dili lamang mga langyaw ang nalambigit sa krimen, tungod kay adunay mga kaso diin mismong mga Pilipino ang nag-abuso ug nagpahimulos sa ilang kaugalingong mga anak o kadugo pinaagi sa pagbaligya sa ilang mga hulagway ug materyales online.
Giingon ni Borja nga ang Pilipinas giila nga usa sa mga nag-unang tinubdan sa Child Sexual Abuse and Exploitative Materials o CSAEM sukad sa panahon sa pandemya. Matud niya, ang kalihokan nahimo nang panginabuhian sa pipila ka pamilya, apan dakong kadaot ang epekto niini sa mga kabataan nga mahimong biktima sa pagpang-abuso ug pagpahimulos.
Photo courtesy: Philippine News Agency/PNP
