Misang-at ug kasong grave oral defamation si Senador Erwin Tulfo batok kang Atty. Levito Baligod, kanhi kongresista Mike Defensor, ug upat pa ka indibidwal tungod sa giingong pagpangdaot kaniya human sa mga alegasyong nakadawat ang Senador ug maleta maletang kwarta.
Gipasaka sa Senador ang iyang complaint-affidavit sa Mandaluyong City Prosecutor’s Office, diin gireklamo sila Baligod, Defensor, Jeron Valderama, Bernard Gumban, Virgilio Garcia, ug Quezon City Councilor Ranulfo “Rannie” Ludovica.
Matod pa ni Tulfo nga ang pagpasaka sa maong kaso naggikan sa iyang reklamo atol sa gipahigayon nga “Blue Ribbon Sub-Committee” nga may kalabotan sa kontrobersiya sa flood control sa Double Gem EDSA Garden Events Place sa Mandaluyong City.
Dugang pa sa Senador nga giapil siya sa mga respondents sa giingong paghatod og mga “maleta” o mga bag nga adunay sulod nga kwarta nga gikan sa mga proyektong gipondohan sa gobyerno. Gani, sumala pa sa complaint-affidavit ni Tulfo, giingong gipakaulawan siya ug kini nakadaot sa iyang dungog ug kredibilidad isip usa ka opisyal sa gobyerno ug isip usa ka amahan sa pamilya.
Gi-alegaran usab ni Tulfo nga sila Defensor ug Baligod ang nanguna sa maong kalihokan. Samtang kusganong giingon sa Senador wala siya nalambigit sa mga proyekto sa imprastraktura, flood control, o farm-to-market road.
Gani, wala kuno unta siya’y plano nga mopasaka og dugang reklamo, apan gitambagan siya sa iyang abogado nga mohimo og legal nga aksyon aron tubagon ang mga alegasyon.
Photo Courtesy: Philippine News Agency
