Midagsa karon sa mga online selling platform sa Russia ang mga gigamit na o secondhand nga silicone breast implant nga gipangbaligya sa mga kababayen-an aron mabawi ang nagasto sa ilang operasyon.
Sumala sa mga eksperto, gibuhat nila kini nga kalakaran sa nagkagrabe nga krisis sa ekonomiya sa maong nasod, diin miubos ang bili sa ilang salapi ug nanghawa ang mga dagkong internasyonal nga kumpanya. Tungod niini, napugos ang pipila ka residente lakip na ang gikan sa Moscow ug St. Petersburg sa pagbaligya sa ilang mga personal nga kabtangan aron makasugakod sa kalisod. Ang mga implant nga nagkantidad kaniadto og ₱112,000 mibalor na lang karon sa ₱28,000.
Bisan pa man niini, nagpagawas og seryosong pasidaan ang mga doktor nga delikado ug walay medikal nga eksperto ang mosugot nga mogamit niini.
Ang secondhand nga implant hugot nga i-reject sa immune system sa bag-ong mogamit, mamahimong magpahinabo og tissue necrosis (pagkamatay sa tissue), ug mahimo pang mosangpot sa kamatayon tungod sa mga nahabiling biomaterial sa unang tag-iya.
Photo Courtesy: Youtube
