Kapin sa 6 milyones ka mga Pilipino nga adunay trabaho ang nanginahanglan pa og dugang oras sa trabaho o laing mapangitaan og kita niadtong Mayo 2026, bisan pa og mikunhod ang ihap sa mga underemployed kumpara sa miaging tuig ug sa Abril ning tuiga.
Base sa pinakabag-ong Labor Force Survey sa Philippine Statistics Authority (PSA), ang underemployment rate mikunhod ngadto sa 12.2 porsyento sa Mayo 2026 gikan sa 13.1 porsyento sa Mayo 2025 ug 15.2 porsyento sa Abril 2026.
Katumbas kini sa 6.04 milyon sa 49.63 milyon ka mga Pilipinong adunay trabaho nga nagtinguha pa og dugang oras sa ilang kasamtangang trabaho, laing trabaho, o bag-ong trabaho nga adunay mas taas nga oras sa pagpanarbaho.
Sa maong ihap, 53.7 porsyento ang nagtrabaho og ubos sa 40 oras kada semana, lakip ang wala makatrabaho sa gitakdang panahon sa survey. Samtang 46.3 porsyento ang nagtrabaho na og 40 oras o labaw pa kada semana apan gusto gihapon og dugang trabaho aron madugangan ang ilang kita.
Samtang, ang labor force participation rate sa nasod niadtong Mayo miabot sa 63.8 porsyento, mas ubos kumpara sa 65.8 porsyento sa Mayo 2025 apan mas taas kaysa 62.7 porsyento nga natala niadtong Abril.
Sa kinatibuk-an, adunay 52.13 milyon ka mga Pilipinong nag-edad og 15-anyos pataas nga kabahin sa labor force sa Mayo 2026.
Photo Courtesy: PSA
