Kapin sa 650 ka pamilyang Tboli nga nagpuyo sa hilit nga mga komunidad sa Barangay Nomoh, Maasim, Sarangani ang nakadawat og family food packs niadtong Hulyo 7, 2026 isip kabahin sa nagpadayon nga paghatag og ayuda ngadto sa mga naapektuhan sa magnitude 7.8 nga linog sa Sarangani.
Bisan sa kalisod sa pagbiyahe, naningkamot ang mga benepisyaryo aron makaabot sa lugar sa distribusyon. Ang uban mibaktas sulod sa pipila ka oras agi sa kabukiran ug nagtabok sa mga suba, samtang adunay mga pamilya nga migamit og kabayo aron masayon ang ilang paglakaw. Human makadawat sa ayuda, ilang gipasan ang mga food packs ug gitabok pag-usab ang kusog nga agos sa suba aron madala kini ngadto sa ilang mga panimalay.
Ang maong relief operation nahimong posible pinaagi sa panagtambayayong sa Municipal Tribal Council of Maasim, Consuelo Zobel Alger Foundation, ug Alsons Power Group. Pinaagi sa ilang kooperasyon, naabot ang mga komunidad nga lisod sudlon ug nahatagan og hinungdanong suporta ang mga pamilyang nagpadayon sa pagbangon gikan sa epekto sa linog.
Padayon ang panawagan sa mga nag-organisa sa relief operations nga ipadayon ang pagtinabangay aron matabangan pa ang ubang mga komunidad nga nagpuyo sa mga kabukiran ug hilit nga mga lugar. Bisan sa kalisod sa kahimtang, nagpadayon ang paghatod sa tabang pinaagi sa panaghiusa sa mga partner, donors, volunteers, ug lokal nga mga lider aron walay pamilyang mabiyaan sa pagbangon human sa kalamidad.
Photo Courtesy: Wikipedia
