Patay nang nakit-an ang usa ka lalaki nga giila lamang sa alyas nga “Karding” sa Purok 13, Barangay Managoc, Malaybalay City, human kini mawala atol sa kusog ug kalit nga pagbaha kagahapong adlawa.
Sumala sa inisyal nga report, residente ang biktima sa Purok 11 sa nahisgutang barangay. Giingong misulay kini sa pagluwas sa iyang binuhing hayop apan nalumos tungod sa kusog nga sulog sa baha.
Nakit-an ang lawas sa biktima nga nasangit sa Purok 13 human sa pagpangita sa mga responder ug mga residente.
Kahinumduman nga misaka ang tubig sa mga basakan ug ubang ubos nga lugar sa Barangay Managoc tungod sa grabeng pag-ulan nga nasinatian kagahapong adlawa.
Photo Courtesy:Melogen Victorillo Delos Reyes
