Nagpadayon ang kagamhanang probinsyal sa Cotabato sa operasyon sa pagtangtang sa lapok ug pagpanglimpyo sa mga sapa gamit ang amphibious excavator sa Brgy. Dunguan sa M’lang, ug sa Brgy. Popoyon ug Brgy. Lagundi sa Tulunan (SGA-BARMM).
Sumala sa Provincial Engineer’s Office, nalimpyohan na ang duha (2) ka kilometro sa Brgy. Lagundi, tulo (3) ka kilometro sa Brgy. Dunguan, ug usa (1) ka kilometro sa Brgy. Popoyon. Ang maong kalihokan makatabang sa pagpaayo sa agos sa tubig ug pagpakunhod sa hulga sa pagbaha, ilabina sa panahon sa ting-ulan.
Nagpasalamat ang mga residente ug mga opisyal sa kagamhanang probinsyal ubos sa pagpanguna ni Gobernador Emmylou Mendoza, uban sa suporta sa lokal nga kagamhanan, tungod sa dali ug epektibong pagtubag sa ilang hangyo nga limpyohan ang mga nag-unang sapa sa ilang komunidad.
Photo Courtesy: Provincial Government of Cotabato
