Nasikop sa kapulisan ang Lima (5) ka wanted persons human kini nalit-ag atol sa manhunt operations nga gipahigayon sa General Luna Municipal Police Station (MPS). Ang operasyon kabahin sa kampanya sa kapulisan aron mapaatubang sa korte ang mga gipangita sa balaod.
Ubos sa pagpangulo ni PCPT Ariel E. Esperon, Officer-in-Charge sa General Luna MPS, upat (4) ka wanted persons ang nasikop sa nagkalain-laing operasyon sa Barangay Suyangan.
Ang mga nadakpan giatubang og kasong Qualified Theft, diin tulo (3) kanila adunay walo (8) ka kaso samtang usa (1) adunay usa ka kaso sa maong kalapasan.
Samtang lain pang usa pa ka wanted person ang nadakpan atol sa hiniusang manhunt operation sa General Luna MPS ug Tourist Police Unit sa Barangay Consuelo. Ang maong suspek adunay kasong Perjury ubos sa Article 183 sa Revised Penal Code.
Giawhag usab ang General Luna MPS sa publiko nga magpadayon sa paghatag og impormasyon bahin sa mga wanted persons aron mas mapadali ang pagpatuman sa balaod ug pagmintinar sa kalinaw sa komunidad.
