Paglabay sa 33 ka tuig nakabalik sa iyang tinuod nga pamilya ang usa ka lalaki sa China nga gikidnap pa sa dihang upat pa lamang ka tuig ang iyang panuigon.
Si Li Jingwei nakahinumdom lamang sa pipila ka hulagway sa iyang gipuy-an sa pagkabata, lakip ang usa ka kawayanan, gamayng linaw, ug eskwelahan. Tungod niini, iyang gidrawing ang mapa sa baryo base sa iyang nahinumduman ug gi-upload kini sa social media aron mangayo og tabang sa publiko.
Paspas ang pagkatag sa iyang video ug mitabang ang mga awtoridad, mga netizen, ug modernong teknolohiya sa pagtino sa posibleng lokasyon sa iyang gigikanan. Sa imbestigasyon, nadiskubre nga biktima diay siya sa child trafficking niadtong 1989.
Human mailhan ang usa ka babaye nga posible niyang inahan, gipailalom silang duha sa DNA test nga nagpamatuod nga sila tinuod nga mag-inahan. Sa ilang unang pagkakita pag-usab pinaagi sa video call ug sa personal nga panagkita, emosyonal ang ilang panagtagbo human sa kapin tulo ka dekada nga pagkabulag.
Bisan namatay na ang iyang amahan, nagpasalamat si Li sa tanang boluntaryo, awtoridad, ug netizen nga mitabang sa pagpangita, Matod niya nga wala usab siyay pagdumot sa pamilyang nagpadako kaniya, tungod kay maayo ang ilang pag-atiman kaniya bisan wala siya masayod nga gikidnap diay siya.
Photo Courtesy: The Guardian
