Nagpadayon ang pag-ulbo sa mga wildfire sa habagatang Europa samtang misaka na usab ang temperatura tungod sa heatwave, nga nakaapekto sa Portugal, Spain, France, ug Greece.
Kapin 19,000 ka ektarya sa kalasangan ug yuta ang nalamoy sa kalayo, samtang gilauman nga moabot sa 40°C ang temperatura sa pipila ka mga lugar. Gatusan ka mga bombero ang nagpadayon sa pagpugong sa mga sunog, ug daghang residente ang napugos sa pagbakwit gikan sa ilang mga panimalay.
Sa France, ang dakong sunog naghulga pa gani sa usa ka yugto sa Tour de France, samtang sa Greece, duha ka pabrika ang nasunog ug napugos ang mga awtoridad sa pagpahawa sa mga residente tungod sa makadaot nga aso.
Matod sa mga awtoridad, ang grabeng kainit ug hulaw nga gipasamot sa climate change maoy gituohang hinungdan sa sayong pagsugod sa wildfire season karong tuiga. Busa, gipasidan-an ang publiko nga magmatngon aron malikayan ang dugang pang mga sunog.
Photo Courtesy: CTIF
