Nasamdan ang usa ka pasahero samtang unom ka mga sakyanan—lakip ang duha ka bus ug upat ka truck—ang nangabuakan sa windshield human sa sunod-sunod nga pagpanglabay og bato niadtong Hulyo 5, 2026, alas 10:00 sa gabii sa may Poblacion, Quezon, Bukidnon.
Sumala ni PLTCOL Erwin R. Nailga, ang OIC sa Quezon Municipal Police Station (MPS), sa pakighinabi sa Juander Radyo Malaybalay, dako ang kakurat sa mga pasahero sa usa ka bus nga nagbiyahe gikan sa Davao padulong Cagayan de Oro sa dihang kalit lang mibuto ang samin niini human maigo sa dakong bato.
Human sa maong unang insidente, midiretso ang driver ug konduktor sa bus ngadto sa estasyon sa kapulisan aron mag-report, apan pipila lang ka minutos ang milabay, sunod-sunod nga giatake sa susamang pagpanglabay og bato ang laing usa ka bus ug upat pa ka mga truck. Tungod sa kahadlok ug sa sunod-sunod nga hitabo, nagtapok ang mga apektadong bus ug truck sa lungsod sa Quezon aron magpatabang sa kapulisan ug maghulat og dugang nga seguridad sa ilang biyahe.
Sa kasamtangan, padayon pa ang gihimong imbestigasyon sa mga awtoridad kung asa giingong mga grupo sa batan-on ang luyo niini alang sa tukmang aksyon.
Giawhag usab sa Quezon MPS ang tanang mga motorista ug mga biyahero nga magmabinantayon sa dalan ug daling ireport sa kapulisan kung adunay makit-an nga kadudahang lihok sa maong dapit.
Photo Courtesy: Quezon MPS
