Gipahugtan karon sa Department of Education (DepEd) Bukidnon ang seguridad sa tanang tunghaan sa probinsya ug gipaspasan ang mga lakang batok sa bullying aron masiguro ang kaluwasan sa mga estudyante.
Sumala ni Schools Division Superintendent Dr. Victoria Gazo, sa exclusive nga pakighinabi sa Juander Radyo Malaybalay dugay na kining gipatuman sa tibuok lalawigan apan mas gihugtan pa kini karon isip reaksyon ug dinalian nga pagpangandam human sa nahitabong dautang insidente sa bullying didto sa Tacloban City.
Gipadayag ni Dr. Gazo ang iyang dakong kalipay sa pakigtimbayayong sa Philippine National Police (PNP) aron mas epektibo pang mabantayan ang mga eskwelahan ug mapatuman ang mga protective policies alang sa mga kabataan. Gihatagan og gibug-aton sa opisyal nga ang bullying dili lamang simpleng isyu sa sulod sa classroom kondili usa ka dakong hagit nga nagkinahanglan sa seryosong pagpakabana ug pagtinabangay sa matag ginikanan ug sa tibuok komunidad.
Pinaagi niining hiniusang paningkamot sa lain-laing sektor, kapulisan, ug mga pamilya, gilauman sa DepEd Bukidnon nga hingpit nga mamahimong luwas, malinawon, ug haom nga palibot alang sa pagpaambit sa kahibalo ang tanang tunghaan sa lalawigan aron layo sa bisan unsang matang sa pagtamay ug kahadlok ang mga tinun-an.
