Andam na ang kagamhanang Lokal sa Valencia City alang sa pagsaulog sa gipaabot nga Gakit Festival 2026 nga pormal nga sugdan ugma, Hulyo 8 hangtod Hulyo 10, diha sa Riverside Boulevard, Barangay Batangan sa syudad.
Karong tuiga, nagdala sa madasigong tema nga “Pulangui Atong Garbo, Kinaiyahan Atong Bahandi,” ang tulo ka adlaw nga kapistahan gipangulohan ni City Mayor Amie Galario kaabag ang nagkalain-laing komite sa turismo ug kultura aron ikapasigarbo ang tradisyon sa katawhang Valencianos.
Sugdan ang unang adlaw sa kapistahan ugma sa buntag pinaagi sa “Pamuhat” o tradisyonal nga seremonya sa mga lumad, nga pagasundan sa sikat nga Gakit Parade kon parada sa mabulukong mga balsa diha sa Suba sa Pulangi. Lakip usab sa mga pito ka bituon nga aktibidad sa mosunod nga mga adlaw mao ang Food Bazaar, “Nanangon” storytelling, “Pamana” Cultural Fashion Show, Festival Queen Competition, pasundayag sa Bukidnon Fire Dancers, ug ang makasaysayanong Reunion of the Clans.
Isip engrandeng pagtapos sa maong kulturanhong selebrasyon, adunay ipahigayon nga Zumba Dance Fitness ug Awarding Ceremony sa Biyernes sa gabii. Gawas niini, gipasalig usab sa City Events Committee nga mapuno sa kalingawan ang matag gabii sa festival pinaagi sa pagpasundayag sa duha ka managlahing Musical Fireworks Display alang sa pag-abli ug pagtapos sa maong kapistahan
Giawhag sa lokal nga kagamhanan ang tanang mga residente ug mga bisita sa pagsaksi sa tulo ka adlaw nga selebrasyon aron masinati ang tinuod nga kultura, kasaysayan, ug tradisyon sa katawhang Valencianos.
Photo Courtesy: LGU – Valencia City
