Gitutokan karon sa lokal nga kagamhanan sa cabanglasan nga mapaubos ang poverty incidence rate sa lungsod gikan sa 31.6 porsyento ngadto sa 21.6 porsyento o 10 porsyentong pagkunhod pagsugod sa tuig 2028, sumala sa gipadayag ni Mayor Bernie “Loloy” C. Castillanes atol sa iyang 2026 State of the Municipality Address (SOMA).
Base sa 2024 data sa Philippine Statistics Authority (PSA), adunay 38,545 ka residente ang nasuta sa lungsod ug 12,180 niini ang nalakip sa mga kabus. Tungod niini, ang Cabanglasan maoy ikapito nga adunay labing taas nga poverty incidence rate sa tibuok Probinsya sa Bukidnon.
Gibutyag usab sa mayor nga ang tumong sa administrasyon mao ang pagpaubos sa gidaghanon sa mga kabus ngadto sa 8,326 ka indibidwal sulod sa duha ka tuig pinaagi sa nagkalain-laing programa alang sa panginabuhian, agrikultura, trabaho ug uban pang serbisyo sa komunidad
Hisayrang sa lebel sa mga barangay, ang Poblacion adunay labing daghang naitalang kabus nga 2,508 ka indibidwal, gisundan sa Iba nga adunay 1,662, samtang ang ubang barangay sama sa Canangaan, Capinonan, Mandahican, Paradise ug Cabulohan adunay kapin sa 700 ka kabus nga mga residente base gihapon sa datos sa PSA
Photo Courtesy: LGU – Cabanglasan
