Gikumpirma sa World Meteorological Organization (WMO) nga nagsugod na ang El Niño sa tropical Pacific ug gilauman nga paspas kini nga mokusog sa umaabot nga mga bulan. Sumala sa WMO, ang kusog nga El Niño mahimong makapadako sa posibilidad sa heatwaves, hulaw, kusog nga pag-ulan, ug uban pang grabeng kahimtang sa panahon sa daghang bahin sa kalibutan. Gilauman usab nga mosaka pa og kapin sa 2°C ang temperatura sa dagat sa central ug eastern equatorial Pacific.
Matud sa WMO, dako ang pagsalig sa ilang forecast tungod kay nagkahiusa ang mga climate models nga ang El Niño mopadayon hangtod sa ulahing bahin sa 2026. Bisan natural nga climate pattern ang El Niño ug kasagarang mahitabo matag duha hangtod pito ka tuig, mahimong lahi-lahi ang epekto niini depende sa kusog ug gidugayon niini. Lakip sa posibleng maapektuhan ang agrikultura, suplay sa tubig, panglawas, ug kaluwasan sa mga komunidad.
Tungod niini, gipakusgan sa WMO ang koordinasyon uban sa mga gobyerno, humanitarian organizations, ug climate-sensitive sectors aron mapalig-on ang early warning systems ug andam ang mga komunidad sa posibleng epekto sa El Niño. Giawhag usab ang publiko ug lokal nga mga awtoridad nga magpabiling alerto ug mosunod sa mga advisories aron malikayan ang dakong kadaot sa kinabuhi ug panginabuhian.
Photo courtesy: UN Today
