Gisugdan sa Philippine Statistics Authority (PSA) ang pag-update sa listahan sa tanang aquaculture farms sa Bukidnon, lakip ang mga fishpond, fish cage, ug fish pen, gikan Hunyo 29 hangtod Agosto 7, 2026.
Sa usa ka interview sa Juander Radyo Malaybalay kang Pinky Rose Rabinas, Statistical Specialist II, iyang gipatin-aw nga ang maong operasyon nagtumong sa paghimo og ensaktong sampling frame o listahan nga basehan sa mga umaabot nga surveys aron masusi ang dagan sa industriya sa pangisda.
Ang usa ka dakong kausaban karong tuiga mao ang paglakip na sa mga farm nga gigamit lang alang sa konsumo sa pamilya (household consumption) ug dili lang kadtong alang sa negosyo.
Nagsugod na usab ang mga enumerators sa pagbisita sa mga farm operators aron pagkuha sa mga importanteng impormasyon sama sa ngalan sa tagdumala, lokasyon, klase sa kalihokan, ug kon aktibo pa ba kini.
Gipasalig sa PSA nga ang tanang makolekta nga datos magpabilin nga kompidensyal ug protektado ubos sa Republic Act No. 10625 ug Data Privacy Act of 2012. Tungod niini, nanawagan ang ahensya alang sa bug-os nga kooperasyon sa mga operators aron mas mapalig-on ang mga programa sa pagpalambo sa sektor sa agrikultura sa nasod.
Photo Courtesy: PSA – Bukidnon
