Gisugdan na sa Municipal Disaster Risk Reduction and Management Office MDRRMO Nabunturan ug kauban ang NERT Nabunturan ang pagsaulog sa National Disaster Resilience Month 2026 pinaagi sa unang kalihokan niini nga mao ang duha ka adlaw nga Patient Transport Vehicle (PTV) Operation Training alang sa mga Barangay PTV drivers.
Gipahigayon ang maong pagbansay sa Frankie Hall, ComVal Hotel sa Poblacion, Nabunturan, diin gitambongan usab ni Vice Mayor Cyrian Reterba nga nagpahayag sa iyang suporta sa programa ug nagpasiugda sa kamahinungdanon sa luwas ug responsableng serbisyo sa pagdala sa mga pasyente.
Sumala kang MDRRMO Head Jennifer Cualing Flores-Echavez, Atol sa pag-interview sa Juander Radyo News Team nga ang maong training maoy kick-off activity sa tibuok bulan nga pagsaulog sa National Disaster Resilience Month ug gitambongan sa mga drivers sa 12 ka barangay nga nakadawat og bag-ong rescue vehicles gikan kang Congressman Ceniza.
Matud pa ni Flores-Echavez, tumong sa maong pagbansay ang paghatag sa mga drayber sa hustong kahibalo sa rescue vehicle operation, lakip ang balaod sa karsada, katungod ug responsibilidad sa drayber, husto nga pag-atiman sa mga pasyente, ug ang angay nga pamaagi sa pagmaneho atol sa emerhensiya.
Dugang pa niya, adunay posibling mga rescue vehicle nga gilauman nga mahatag sa ubang barangay, ug ang mga drayber niini pagapaagion usab sa susamang pagbansay.
Sa iyang mensahe ngadto sa mga partisipante, gipahinumdoman ni Flores-Echavez ang tanang drayber nga unahon kanunay ang kaluwasan sa ilang kaugalingon ug sa ilang mga pasahero.
Ang maong kalihokan kabahin sa padayon nga paningkamot sa lokal nga panggamhanan sa Nabunturan aron mapalig-on ang pagpangandam sa komunidad batok sa mga kalamidad ug mapauswag ang kapasidad sa pagtubag sa mga emerhensiya hangtod sa lebel sa barangay.
