Gipakusgan sa Provincial Veterinary Office (PROVET) sa Zamboanga Sibugay ang ilang kampanya batok sa rabies aron mapanalipdan ang panglawas sa katawhan ug sa mga binuhi.
Kini nga mga lakang sa Departamento mas gipahugtan kauban sa Department of Health (DOH) tungod sa nagkataas nga kaso sa Probinsya.
Bisan padayon ang programa sa libreng anti-rabies vaccination, giawhag sa PROVET ang tanang pet owners nga ipabakuna matag tuig ang ilang mga iro ug iring. Importante usab nga responsableng atimanon ang mga binuhi ug dili pasagdan nga maglatagaw aron malikayan ang pagkaylap sa rabies.
Gipahinumdoman usab ang publiko nga kon mapaakan o magasgasan sa iro o iring, hugasan dayon ang samad gamit ang sabon ug nagaagay nga tubig sulod sa labing menos kinse minutos, ug dayon magpakonsulta sa labing duol nga Animal Bite Treatment Center alang sa hustong tambal ug bakuna.
Nagpadayon ang PROVET sa paglibot sa mga lungsod sa Zamboanga Sibugay aron magpahigayon og information campaign ug mass dog vaccination isip kabahin sa tumong nga mapugngan ug mapapas ang rabies sa probinsya.
Photo Courtesy: Alodokter
