Taliwala sa pagsaulog sa Nutrition Month karong bulan sa Hulyo, nagpabiling dakong hagit ang pagsumpo sa problem sa stunting ug malnutrisyon sa tibuok northern Mindanao.
Gipadayag ni Reginaldo T. Guillen, ang OIC Nutrition Program Coordinator sa National Nutrition Council (NNC) Region X nga nakitaan og pagsaka ang ihap sa kaso sa stunting sa rehiyon o pagkaputot sa mga kabataan tungod sa kakulang sa saktong nutrisyon.
Gikan sa stunting rate nga 25% nahimo kining 27% nga gikasubo sa National Nutrition Council. Timailhan sab kini nga angay pang pakusgon sa gobyerno ang mga programa sa saktong nutrisyon labi na sa mga kabataan aron nga padayong mapaubos ang ihap sa kaso sa stunting.
Giila sab ni Guillen ang mga hagit nga hinungdan sa problema sa nutrition sama sa seryosong hulga sa food insecurity busa labing mahinungdanon nga iduso ang malungtaron ug malahutayong kalambuan ug pagprotekta sa kinaiyahan nga nag-unang tinubdan sa pagkaon.
Photo courtesy: National Nutrition Council Region X
