Nagsugod na ang usa ka semana nga seremonya sa lubong sa kanhi Supreme Leader sa Iran, Ali Khamenei, diin gidagsa sa mga nagbangutan ang unang seremonya nga gipahigayon sa Tehran.
Gipahigayon ang unang adlaw sa seremonya sa Imam Khomeini Grand Mosalla, diin liboan ka mga tawo ang nagtigom aron mohatag og katapusang pasidungog kang Khamenei. Ang iyang lungon, nga gitabonan sa bandila sa Iran ug adunay itom nga turban sa ibabaw, gibutang uban sa upat pa ka lungon sa iyang mga kapamilyang namatay usab.
Atol sa seremonya, nadungog ang mga pag-ampo, pagbasa sa Koran ug mga relihiyosong awit. Adunay usab mga nagtambong nga naninggit og mga slogan batok sa Estados Unidos ug nanawagan og panimalos.
Sumala sa mga awtoridad, ang lawas ni Khamenei dad-on usab sa mga syudad sa Qom, Najaf ug Karbala sa dili pa kini ilubong sa Huwebes sa Mashhad.
Si Khamenei namatay niadtong Pebrero human mapatay sa airstrike atol sa gubat nga gilunsad sa Estados Unidos ug Israel. Samtang, wala pa gihapon makita sa publiko ang iyang anak ug bag-ong Supreme Leader nga si Mojtaba Khamenei sukad siya naangol sa maong pag-atake.
Photo Courtesy: Wikipedia
