Patay ang usa ka 57-anyos nga driver sa motorsiklo, samtang angol ang 76-anyos nga lalaki sa nahitabong aksidente sa kadalanan nga natala sa Purok Potato, Barangay Poblacion, Pitogo, Zamboanga del Sur, adlaw’ng Miyerkules, Nobyembre 18, 2026.
Sa inisyal nga imbestigasyon sa Pitogo Municipal Police Station nagbiyahe padulong sa Barangay Panubigan gikan sa Pagadian City ang usa ka pula nga Honda RSX nga motorsiklo dihang aksidenteng nabanggaan niini ang usa ka pedestrian nga mitabok sa kalsada.
Tungod sa kusog nga impact sa pagkabangga, nangaangol ang duha ka biktima ug gidala dayon ngadto sa Pitogo Rural Health Unit aron matambalan. Apan, gideklarang dead on arrival ang 57-anyos nga driver sa motorsiklo, samtang gidala sa hospital ang 76 anyos nga pedestrian alang sa dugang nga pagpatambal.
Ang motorsiklo nga nalambigit sa pagkabangga giturn-over na ngadto sa nagbangutang pamilya sa biktimang driver. Padayon pa usab nga naglusad ug imbestigasyon ang kapulisan sa Pitogo Municipal Police Station alang sa tukmang lakang.
Photo courtesy: PIO ZSPPO










