Giklaro sa Department of Education (DepEd) Tacloban City Division nga anaa sa tagsa-tagsa ka eskwelahan ang pagdesisyon kon kinahanglan bang suspindihon ang face-to-face classes tungod sa grabeng kainit sa panahon sa ilang tagsa-tagsa ka lugar.
Sumala kang Dr. Nilo Eder, Information Officer sa DepEd Tacloban City Division, gitugotan ang mga school head nga magdesisyon sa paghunong sa face-to-face classes subay sa gipatuman nga 4-H Framework sa ahensya.
Kinahanglan lamang nga pahibaw-on gihapon sa mga eskwelahan ang ilang Division Office kon magdesisyon sila nga temporaryong undangon ang presensyal nga klase.
Dugang pa ni Eder, adunay mga eskwelahan nga nagpatuman og mas mubong oras sa klase sa buntag ug paggamit sa mga module sa hapon isip alternatibong pamaagi aron mapadayon ang pagkat-on sa mga estudyante.
Pinaagi niini nga mga pamaagi, tumong sa DepEd nga masiguro ang pagpadayon sa edukasyon samtang nag-una gihapon ang kaluwasan sa mga estudyante batok sa posibleng peligro nga mahimong idulot sa grabeng kainit sa panahon.










