Mahimong host ang Technical Education and Skills Development Authority (TESDA) Zamboanga Peninsula alang sa pagpahigayon sa WorldSkills Philippines sa tuig 2027.
Matud ni TESDA 9 Regional Director Engr. Alan T. Bacatan, gilauman nga magtapok sa rehiyon ang mga kwalipikadong partisipante gikan sa nagkalain-laing dapit sa nasud aron makigtigi ug magpakita sa ilang kahibalo ug abilidad sa nagkalain-laing technical-vocational skills.
Segun ni RD Bacatan, sa nakalabayng bulan sa Septyembre gihimo ang WorldSkills Competition sa China diin adunay napulo ka mga competitor gikan sa Pilipinas ang nakigtigi alang sa mga medalya.
Segun ni RD Bacatan Ang maong kompetisyon usa ka oportunidad alang sa mga estudyante ug graduates sa Technical-Vocational Education and Training (TVET) nga ipakita ang ilang kahusay sa abilidad.
Gilauman usab nga makatampo kini sa pagpalambo sa kalidad sa technical-vocational education, pag-ila sa mga batid nga trabahante ug pagdasig sa mga kabatan-onan nga magpalambo sa ilang mga kahanas.
Dako usab kini nga oportunidad alang sa Zamboanga Peninsula nga ipakita ang kapasidad sa rehiyon sa pagpahigayon og national activity nga may kalabotan sa skills development ug employment.










