Nanawagan si Palace Press Officer Claire Castro og pagrespeto tali sa mga Pilipino bisan pa man og nagkalahi ang ilang baroganan sa politika, human siya gisamok ug gisinggitan sa pipila ka mga nagprotesta sa Vancouver.
Sumala kang Castro, nagkuha sila og video uban ni Presidential Communications Office Director Robertzon Ramirez aron mahatagan og update ang publiko sa opisyal nga mga kalihokan ni Presidente Ferdinand Marcos Jr. sa Canada, apan wala nila mahuman ang ilang pagrekord human sila duolon ug singgitan sa usa ka Pilipino nga wala makauyon sa administrasyon.
Matod pa niya, misunod pa ang ubang mga nagprotesta ug nagpadayon sa pagsinggit batok sa Presidente, nga nakabalda sa ilang trabaho.
Bisan giila ni Castro ang katungod sa matag usa sa pagpahayag sa ilang opinyon, iyang giingon nga kinahanglan kini buhaton uban sa pagtahod ug maayong pamatasan. Iyang gipadayag usab nga gitawag siya og “pangit” ug “sinungaling,” ug mibati siya og kahadlok human sila gisundan sa grupo, hinungdan nga miduol sila sa mga pulis nga ilang nasugatan.
Matod pa ni Castro, wala sila sa Canada aron magbakasyon kondili aron tumanon ang ilang katungdanan isip kabahin sa opisyal nga delegasyon sa Presidente. Busa, iyang giaghat ang mga Pilipino nga magpabiling sibil ug matinahuron sa pagpakigpulong bisan pa man og adunay kalainan sa ilang politikanhong panglantaw.
Photo Courtesy: Philippine News Agency
