Nagpahigayon karon sa hot pursuit operation ang kapulisan sa Digos Police Station sa pagpangulo ni PLtCol Norman Yparaguirre,OIC aron masikop ang suspek nga nipusil sa usa ka waitress sa usa ka karenderya nga nahimutang sa Tiradpas Street, Barangay Zone 3, Digos City, alas 12:24 sa udto, Domingo, Hulyo 5,2026.
Sa report nga nahipos sa Juander Radyo Digos, ang biktima nagpangidaron sa 35-anyos ug lumad nga taga Maragusan, Davao de Oro. Saysay sa biktima nga nagpakaaaron-ignon ang suspek nga kostumer.
Sa dihang pangayuon na sa biktima ang order niini, kalit mibunlot ang suspek sa armas niini ug gipusil ang biktima sa makatulo nga higayon.
Igo ang biktima sa wala nga bahin sa dughan, tuo nga bahin sa dughan ug wala nga bahin sa bukton. Human sa insidente, nisibat ang suspek sa direksyon sa roxas streets, Barangay Zone 3,Digos City.
Atol sa pagproseso sa crime scene, narecover ang 3 fired cartridge cases ug 2 fired bullets nga gituohang gikan sa .45 calibre nga armas.
Sa pagkutlo ning balita, giingong stable na ang kahimtang sa biktima ug padayon nga nagpaalim sa balay tambalanan. Padayon pa ang imbestigasyon sa kapulisan aron masuta ang motibo sa maong pagpamusil.
