Gianunsyo ni United States President Donald Trump ang usa ka bag-o ug gihulagway niyang makasaysayanong kasunduan sa patigayon o trade deal tali sa Estados Unidos ug Pilipinas human sa iyang pakigtagbo kang Pangulong Ferdinand “Bongbong” Marcos Jr.
Sa iyang social media post niadtong Miyerkules, Nobyembre 18, 2026, giingon ni Trump nga dako kini og ikatabang partikular na sa mga mag-uuma ug sa sektor sa enerhiya sa Amerika.
Gihulagway sa lider sa Amerika ang maong kasunduan isip usa ka “true landmark” ug gibutyag nga nagmalampuson ang ilang panaghisgot ni Marcos bahin sa kalakalan, pambansang seguridad, ug uban pang mahinungdanong isyu. Gidayeg usab ni Trump ang presidente sa Pilipinas nga iyang gitawag nga usa ka gamhanan ug adunay taas nga integridad nga lider.
Bisan pa niini, wala na mohatag og dugang detalye si Trump kalabot sa espesipikong unod o mga probisyon sa maong bag-ong trade deal sa iyang gipagawas nga pamahayag.
Photo courtesy: PCO










