Nakadawat na og pasiunang pahibalo ang lokal nga panggamhanan sa Manolo Fortich gikan sa National Commission of Senior Citizens (NCSC) kabahin sa gipaabot nga payout alang sa mga benepisyaryo sa Expanded Centenarian Act, diin bisan wala pay gitakdang eksaktong petsa, gilauman nga ipahigayon kini sa ikaduhang semana sa bulan sa Disyembre karong tuiga.
Sumala kang Raquel Cenia, focal person on senior citizen sa OSCA, makadawat og tag-₱10,000 nga cash gift ang mga senior citizens nga nag-edad og 80, 85, 90, ug 95 anyos nga wala pa nakadawat sa ilang benepisyo, lakip na ang mga 2026 applicants nga nag-birthday gikan sa Hulyo hangtod Oktubre o Nobyembre ingon man kadtong mga aplikante sa miaging mga bulan nga wala pa nakakubra.
Sa pagkakaron, nagpaabot pa ang buhatan sa opisyal nga master list ug pinal nga ihap sa mga benepisyaryo gikan sa NCSC, samtang giabisohan na ang mga kwalipikadong katigulangan ug ang ilang mga pamilya nga mangandam ug maghulat sa sunod nga abiso.
Photo courtesy: LGU Manolo Fortich










