Gisugdan na sa City Government of Kidapawan ang pagpangandam sa mga center islands sa Quezon Boulevard alang sa umaabot nga pagsaulog sa Kapaskuhan. Aktibo nang nagtrabaho ang mga personahe sa City General Services Office o CGSO sa pagpanglimpyo sa mga sanga sa kahoy nga Agoho aron maandam kini nga butangan og mga dekorasyong pang-Pasko ug mga suga.
Kabahin kini sa pagpangandam alang sa Festival of Lights City Christmas Celebration nga gikatakdang ablihan sa Disyembre uno. Matag tuig, nahimong usa sa mga dinarayong atraksyon sa Kidapawan City ang mga hayag nga dekorasyon sa center islands, diin daghang residente ug bisita gikan sa silingang lungsod ang mobisita aron malingaw ug magpakuha og litrato.
Nagtinabangay sa maong operasyon ang CGSO, City Disaster Risk Reduction and Management Office, City Engineering Office, ug Traffic Management and Enforcement Unit.
Gilauman nga mahuman ang pagpangandam sa dili pa matapos ang bulan aron masiguro ang usa ka hayag, matahom, ug malipayong pagsaulog sa Pasko sa Kidapawan City.










