Nagmando og mas hugot nga mga lagda ang Bangko Sentral ng Pilipinas o BSP alang sa mga kompanya nga nagserbisyo sa pagpadala og kuwarta ug pagbaylo og langyaw nga salapi aron mapalig-on ang ilang pinansyal nga kapasidad ug mapanalipdan ang mga konsumidor.
Ubos sa gisugyot nga bag-ong regulasyon kinahanglan nga adunay minimum nga kapital nga 50 milyones pesos ang mga remittance ug money transfer companies samtang 10 milyones pesos alang sa mga money changer ug foreign exchange dealers ilabi na sa mga kompanyang moabot sa gitakdang gidaghanon sa ilang binulang transaksiyon. Lakip usab sa plano ang mandatoryong QR code aron masusi sa mga kustomer kung lehitimo ug awtorisado ba sa BSP ang maong mga negosyo.
Gihatagan usab og duha ka tuig ang kasamtangang mga kompanya gikan sa pagkaepektibo sa bag-ong regulasyon aron makasunod sa mga kinahanglanon ug makakuha og bag-ong Certificate of Authority. Ang mga mapakyas sa pagtuman niini dili na tugotan nga magpadayon sa ilang operasyon.
Gipunting sa BSP nga tumong niini nga mapalig-on ang seguridad sa mga transaksiyon ug masiguro ang kalig-on sa sektor sa pinansyal nga serbisyo sa nasud.










