Gibombahan sa Russia ang duha ka dagkong tulay sa Kyiv, Ukraine, atol sa pag-atake nga nakaapekto usab sa importanteng imprastraktura ug nakabalda sa suplay sa tubig sa pipila ka lugar sa siyudad. Matud ni Kyiv Mayor Vitali Klitschko, naigo sa pag-atake ang North ug South Bridges sa siyudad.
Dugang pa niya, nadaot ang pipila ka critical infrastructure nga maoy hinungdan sa pagkabalda sa suplay sa tubig sa pipila ka distrito. Sa wala pa ang pag-atake, nagpasidaan si Ukrainian President Volodymyr Zelenskyy nga posibleng maglunsad og dugang nga pag-atake ang Russia sa mosunod nga mga adlaw.
Giawhag usab niya ang mga residente nga magmatngon ug kanunayng motubag sa mga pahimangno bahin sa posibleng pag-atake sa mga missile.
Samtang, gilusad usab sa Ukraine og drone attack ang kapital nga rehiyon sa Russia ug naigo usab ang usa ka simbolikong tulay sa Crimea, sumala sa mga opisyal nga gitudlo sa Russia sa maong teritoryo.
Photo courtesy: Newsbytes










