Narekord ang duha ka managlahing insidente sa pagpamusil sa South Africa niadtong Domingo, Nobyembre 15, nga miresulta sa kamatayon sa 17 ka tawo. Unang nahitabo ang pagpamusil sulod sa usa ka minibus sa probinsya sa KwaZulu-Natal diin walo ka lalaki ang nakit-ang patay nga adunay samad pinusilan sulod sa usa ka seven-seater nga sakyanan.
Paglabay sa pipila ka oras, siyam pa ka tawo ang namatay sa laing pagpamusil sa usa ka barung-barong sa Atteridgeville, western Pretoria. Nakaplagan ang mga patayng lawas sa unom ka lalaki ug tulo ka babaye sulod sa usa ka informal settlement. Matod sa pipila ka residente, abi nila nga dalugdog lamang ang mga buto nga ilang nadungog niadtong gabhiona.
Gikumpirma sa kapulisan nga walay kalambigitan ang duha ka insidente, apan padayon ang ilang imbestigasyon aron mahibal-an ang motibo sa mga krimen ug mailhan ang mga responsable. Gilunsad na usab ang manhunt aron madakpan ang mga suspetsado. Dugang pa, dili na bag-o sa South Africa ang mga insidente sa pagpamusil tungod kay aduna na usab mga susamang mass shooting nga natala sa miaging mga bulan.
Photo courtesy: AFP/ Al Jazeera










