Giawhag sa environmental group nga BAN Toxics ang Food and Drug Administration (FDA) ug mga lokal nga panggamhanan nga mag-inspeksyon sa mga merkado human makadiskubre og mga dulaan sa Metro Manila nga walay hustong safety labels. Lakip niini ang mga dulaanang sakyanan, monyeka, robot ug battery-operated toys. Matod sa grupo, posibleng adunay makadaot nga kemikal ang mga produktong wala ma-inspeksyon ug nasusi sa hustong paagi.
Base sa ilang chemical screening niadtong 2025, 125 sa 200 ka dulaan nga gisusi ang nakitaan og lead, nga mahimong makaapekto sa paglambo sa utok ug abilidad sa pagkat-on sa mga bata. Ubos sa Republic Act No. 10620, gikinahanglan nga adunay hustong safety labels, age recommendations ug mga pasidaan ang mga dulaan.
Nanawagan ang BAN Toxics sa FDA, DTI ug mga lokal nga panggamhanan nga hugot nga ipatuman ang mga regulasyon ug tangtangon ang mga produktong makalapas sa safety standards. Giawhag usab ang mga ginikanan nga susihon ang labels ug kaluwasan sa mga dulaan sa dili pa kini paliton alang sa ilang mga anak.










