Gipasiugda sa mga lider sa Pilipinas, Japan, South Korea ug China ang pagpalig-on sa panaghiusa ug pagsalig sa matag nasud aron mas epektibong maatubang ang nagkadaiyang hagit sa ekonomiya ug seguridad sa rehiyon atol sa ika-29 nga ASEAN Plus Three Summit niadtong Lunes. Gipasiugda ni Presidente Ferdinand Marcos Jr. nga ang kooperasyon sa mga nasud kinahanglan maghatag og konkretong benepisyo sa katawhan, ilabina sa pagsaka sa presyo sa pagkaon ug enerhiya, ingon man sa pagkawala sa panginabuhian tungod sa mga kagubot sa tibuok kalibotan.
Gihisgotan usab ni Marcos ang kamahinungdanon sa mga regional mechanism sama sa Chiang Mai Initiative Multilateralization ug ASEAN Plus Three Emergency Rice Reserve aron masiguro ang lig-on nga suplay sa pagkaon ug enerhiya. Samtang gipasalig sa Japan, ubos sa liderato ni Prime Minister Sanae Takaichi, ang padayong suporta sa panaghiusa sa ASEAN, samtang gipasiugda ni South Korean President Lee Jae Myung nga mas mahimong importante ang maong panag-alayon tungod sa nagkadakong kawalay kasigurohan sa kalibotan.
Gipasiugda usab ni Chinese Minister of Agriculture and Rural Affairs Zhang Zhu nga ang pundasyon sa malungtarong kooperasyon mao ang pagsalig sa usag usa, ilabina sa panahon nga nag-atubang ang rehiyon sa mga panagbangi sa geopolitika, hinay nga pagtubo sa ekonomiya ug hulga sa suplay sa pagkaon ug enerhiya. Gilauman usab nga mahimong mas lig-on ang panag-alayon sa ASEAN, China, Japan ug South Korea samtang nagpaingon kini sa ika-30 nga anibersaryo sa ASEAN Plus Three sa sunod tuig.
Photo courtesy: Bongbong Marcos/FB










